மூலஸ்தானத்தில் சிவலிங்க வடிவில் எழுந்தருளியுள்ளார் பசுபதீஸ்வரர். அம்பாள் சிம்மப்பிரியா அழகிய திருவுருவமாக எழுந்தருளி தரிசனம் தருகின்றார். ஆலய முகப்பிலேயே பிரத்யங்கிரா தேவி தனி சந்நிதி கொண்டுள்ளார். கோஷ்டத்தில் நர்த்தன விநாயகர், லிங்கோத்பவர், தட்சிணாமூர்த்தி, பிரம்மா, துர்க்கை, வள்ளி - தெய்வானை உடனாய முருகப் பெருமான் ஆகிய திருவுருவங்களை தரிசிக்கலாம். திசையாதிபதிகள் எண்மரும் அவரவருக்குரிய இடத்தில் எழுந்தருளியுள்ளனர். காலபைரவர் சாந்நித்தியம் மிக்கவராக எழுந்தருளியுள்ளார். ஸ்ரீ தேவி - பூதேவி சகித சுந்தர வரதராஜரும், கனகவல்லித் தாயாரும் தனித்தனி சந்நிதிகள் கொண்டுள்ளனர். ஸ்ரீ சதாசிவ பிரம்மேந்திராள் வழிகாட்டலின்படி கட்டப்பட்ட ஆலயம்.