ஸ்ரீ முத்துஸ்வாமி தீட்சிதரை அடக்கம் செய்த இடத்தில் பெரிய மேடை அமைத்து சிவலிங்க பிரதிஷ்டை செய்துள்ளனர். தீட்சிதரின் சிலா விக்ரகம் ஒன்றும் லிங்கத்தின் முன்னால் இருக்கின்றது. மண்டபத்தில் பிள்ளையார், சுப்ரமண்யர், மீனாட்சி ஆகியோரின் திருவுருவங்களை தரிசிக்கலாம். கி.பி. 1775ஆம் வருஷம், ராமஸ்வாமி தீட்சிதர் - சுப்புலட்சுமி தம்பதியினருக்குப் பிறந்து, சகல சாஸ்திரங்களும் கற்று சங்கீதத்தில் தனி முத்திரை பதித்து வாழ்ந்து வந்தார். சிதம்பரநாத யோகியுடன் காசிப் பயணம் மேற்கொண்டு காசி விஸ்வநாதர், விசாலாட்சி, அன்னபூரணி ஆகிய தெய்வங்களை தினமும் தரிசித்து வந்தார். தனது குருநாதர் பூஜைக்கு உதவிக் கொண்டிருந்தார். பல ஸ்தலங்களுக்கு தீர்த்த யாத்திரை சென்று வந்தார். ஆன்மீகத்தில் ஈடுபட்டுக் கொண்டே சங்கீதத்தையும் வளர்த்தார். எட்டயபுரம் திரும்பி வரும்போது மழை காணாது வறண்டிருந்த கிராமங்களில் 'ஆனந்தாம்ருதாகர்ஷிணி அம்ருதவர்ஷணி' எனும் கீர்த்தனையைப் பாடி மழையை வரவழைத்து கிராம மக்களின் அன்பிற்கு பாத்திரமானார். ஒரு தீபாவளி தினத்தன்று, வீணையை தீட்சிதர் வாசிக்க, 'மீனாட்சி மே முதம் தேஹி' என்ற கீர்த்தனையை சிஷ்யர்கள் பாடினார்கள். 'இந்த உலக பந்தங்களிலிருந்து விடுதலை ஆகப் போகிறேன் - மீண்டும் ஒரு முறை இதே கீர்த்தனையைப் பாடுங்கள்' என சிஷ்யர்களிடம் கூறிவிட்டு, 'சிவேபாஹி' என மூன்று முறை உச்சரித்து, ஜோதிஸ்வரூபமாக அம்பாளின் பாதார விந்தங்களில் ஐக்யமானார். எட்டயபுரம் சமஸ்தானத்தின் உதவியுடனும், பலரது முயற்சிகளாலும் இந்த நினைவாலயம் எழுந்தது.