மூலஸ்தானத்தில் மூலவராக எழுந்தருளியுள்ள ஸ்ரீ விட்டலரின் எழிற்கோலம் மனதை விட்டு அகலாதது. சுயம்பு மூர்த்தம். கிழக்கே திருமுக மண்டலம் கொண்டு நின்ற திருக்கோலத்தில் சேவை சாதிக்கின்றார். இரண்டு கைகளையும் இடுப்பில் வைத்து ஒய்யாரமாக நிற்கின்றார். பாமா-ருக்மணி தேவியர்கள் உடன் உள்ளனர். மேற்கே கருடாழ்வாரை சேவிக்கலாம். உற்சவரான பாண்டுரங்கமூர்த்தி சங்கு - சக்கரதாரியாக சதுர்புஜங்களுடன் கூடிய அழகான திருமேனியுடன் காணப்படுகிறார். ஸ்ரீ தேவி - பூ தேவி - நீளா தேவி தேவியர்கள் உடன் உள்ளனர். நாமதேவர், துக்காராம் ஆகியோரின் வம்ச வாரிசுகளும் பக்தர்களும் வழிபடுகின்றனர். நித்ய பூஜைகளும் ஆராதனைகளும் சிறப்புற நடக்கின்றன. குழந்தைகளின் நலனுக்காக பால் பாயாசம் நைவேத்தியம் செய்கின்றனர்.