சூரன் வழிபட்டதால் சூரக்குடி எனவும், சூரிய பகவானின் பெயரால் சூரியக்குடி எனவும், சூரை செடிகளின் புதர் மண்டிய பகுதி என்பதால் சூரைக்குடி எனவும் அழைக்கப்படுவதாக பல்வேறு கருத்துக்கள் உள்ளன.

மூலவர்: தேசிகநாதர், அம்பாள்: ஆவுடைநாயகி. மூலஸ்தானத்தில் சிவலிங்க வடிவினராக தேசிகநாதர் எழுந்தருளியுள்ளார். அன்னை ஆவுடைநாயகி உடன் எழுந்தருளி அருள்பாலிக்கின்றாள். பரிவாரத் தேவதைகளும் எழுந்தருளியுள்ளனர். இங்குள்ள ஆனந்த பைரவர் சூலத்திற்கு பதிலாக கதாயுதம் வைத்துள்ளார். இவருக்கே முக்கியத்துவம் கொடுக்கப்படுகிறது. தேய்பிறை அஷ்டமியில் சிறப்பு ஹோமங்கள் நடத்தப்படுகின்றன. காசி விஸ்வநாதர் - விசாலாட்சி, வள்ளி - தெய்வயானையுடன் கூடிய முருகப் பெருமான், சரஸ்வதி மற்றும் மகாலட்சுமியை தரிசிக்கலாம். தட்சிணாமூர்த்தி மண்டபம் எனப்படும் 16 கால் மண்டபம், பிரம்மாண்டமான வண்ணக் கோபுரம் ஆகியன நகரத்தார் கோவில்களிலேயே சிறந்த வேலைப்பாடுகளையுடையவை எனும் பெருமை கொண்டவை.