அருள்மிகு ஸ்வாமிநாத ஸ்வாமி திருக்கோவில் (ஸ்வாமிமலை)

மூலவர்: ஸ்வாமிநாதன். உற்சவர்: வள்ளி - தெய்வயானை உடனாய ஆறுமுகன்.

ஸ்கந்த புராணத்துடன் தொடர்புடைய அழகிய சிற்பங்களுடன் திகழும் ஐந்து நிலை ராஜ கோபுரம். அதைக் கடந்து உள்ளே சென்றதும் காணப்படும் தனிக் கோவிலில் மீனாட்சி - சுந்தரேசரை தரிசிக்கலாம்.

அடுத்துள்ள வசந்த மண்டபமருகே மலையடிவாரமும், ஸ்தல விருட்சமான நெல்லி மரமும், வஜ்ர தீர்த்தமும் உள்ளன. மலை உச்சிக்கு ஏறுவதற்கு 60 படிகள் உள்ளன. 'பிரபவ' எனத் தொடங்கி 60 ஆண்டுகளின் பெயர்களைக் கொண்ட படிகள் இவை. இவற்றை 'வருஷத் தேவர்கள்' என்பர். ஸ்கந்த புராணத்துடன் தொடர்புடைய வண்ண ஓவியங்கள் படிச்சுவர்களில் தீட்டப்பட்டுள்ளன. இது 60 அடி (18மீ) உயரமுள்ள குன்று.

படிகள் ஏறிச் சென்று கொண்டிருக்கையில் இரண்டாம் பிரகாரத்தை அடையலாம். அதில் எழுந்தருளி தரிசனம் தரும் 'நேத்ர விநாயகர்' எனப்படும் கண் கொடுத்த விநாயகரை தரிசித்து ஆசி பெற்று, மேலே ஏறிச் சென்று மூன்றாம் பிரகாரத்தை சென்றடையலாம்.

மூன்றாம் பிரகாரத்திலுள்ள மூலஸ்தானத்தில் மூலவராக 'ஸ்வாமிநாதன்' எனப்படும் தகப்பன்சுவாமி எழுந்தருளியுள்ளார். ஆறடி உயரம் கொண்ட அழகிய திருமேனி. தண்டம் ஏந்திய கரமும், வரத ஹஸ்தமும் கொண்டுள்ளார். பார்க்கப் பார்க்க பரவசமூட்டும் அழகிய தோற்றம். விபூதி அபிஷேகத்தில் ஞானியாகவும், சந்தன காப்பில் பாலசுப்ரமண்யராகவும் தோற்றமளிக்கின்றார். சந்நிதிக்கு முன்பாக மயிலுக்குப் பதில் யானை வாகனம் காணலாம்.

நவவீரர்கள், இடும்பன், அகஸ்தியர், அருணகிரிநாதர், உற்சவ மூர்த்திகள் ஆகியோரின் திருவுருவங்களை மகா மண்டபத்தில் தரிசிக்கலாம். தெய்வயானை உடனாய முருகன் 'சேனாபதி' எனும் பெயருடன் இருக்கின்றார்.

உள் மண்டபத்திலுள்ள முருகன் தெய்வயானையோடு தனித்து நிற்கின்றார். வலது கரங்கள் கீழ் நோக்கி வளைந்தும், இடது கரங்கள் நீட்டியும், நடராஜரைப் போல தோற்றமளிக்கின்றார். அழகான திருமேனி. இவரை 'பாகுலேய மூர்த்தி' என்பார்கள்.

பிரகார வலச்சுற்றில் வள்ளி - தெய்வயானை உடனாய ஆறுமுகன் தரிசனம் தருகின்றார். மேல் பிரகாரத்தில் மயில் வாகனத்துடன் காணப்படும் தண்டபாணியின் சிற்பம் அழகாக உள்ளது.

கட்டுமலை மீது எழுப்பப்பட்ட மாடக் கோவில்களுள் இதுவும் ஒன்று.