அருள்மிகு பச்சையம்மன் திருக்கோவில், திருவண்ணாமலை

மூலஸ்தானத்தில் கிழக்கு பார்த்து அமர்ந்த கோலத்தில் தரிசனம் தரும் பச்சையம்மன் மிகவும் சக்தி வாய்ந்தவள். பச்சை நிற ஆடையில், சர்வாலங்கார பூஷிதையாக, அழகே உருவாக காட்சி தருகின்றாள். இடப்பக்கமாக மன்னாதீஸ்வரர் எழுந்தருளியுள்ளார். அடுத்து கௌதமர் உள்ளிட்ட ஏழு ரிஷிகளின் சிலைகள் பயமுறுத்தும் தோரணையில் வெட்டவெளியில் காணப்படுகின்றன. இதன் பின்னாலும் ஏழு ரிஷிகளின் பழைய சிலைகள் இருக்கின்றன. மிகப் பெரிய அளவிலான யானை மற்றும் குதிரை சிலைகளைக் காணலாம். அம்மன் குதிரை எனப்படும் குதிரை மீதேறி பச்சையம்மன் தினமும் நகர்வலம் வருகின்றாள் என ஐதீகம்.