அருள்மிகு நாகாத்தம்மன் திருக்கோயில் (கொருக்குப்பேட்டை)

மூலஸ்தானத்தில் வீற்றிருக்கும் அன்னை நாகாத்தம்மன், பக்தர்களுக்கு கருணையை வாரி வழங்கும் வரப்பிரசாதி. அவளை அணுகுபவர்கள், அவளது திருமுகத்தில் தாய் பாசத்தைக் காண்கிறார்கள். கத்தி, சூலம், உடுக்கை, கபாலம் ஏந்திய சதுர்புஜங்களுடன் கூடிய அழகான திருமேனி. சிரம் மட்டுமே கொண்ட மாரியம்மனையும் தரிசிக்கலாம். உற்சவ அன்னை மகிஷாசூரமர்த்தினி கோலம் கொண்டு வலம் வருகின்றாள். சிதம்பர கணபதி, வள்ளி-தெய்வயானை உடனாய சுப்ரமண்யர் இரண்டு பக்கங்களிலும் உள்ளனர். அநேக தெய்வங்களை வலச்சுற்றில் தரிசிக்கலாம். பெரிய புற்று ஒன்றும் காணப்படுகிறது.