அருள்மிகு சோலைமலை முருகன் திருக்கோவில் (பழமுதிர்சோலை)

நக்கீரருக்கும் அருணகிரிநாதருக்கும் காட்சி தந்த ஸ்தலம் இது. இச்சா சக்தியாக வள்ளியும், கிரியா சக்தியாக தெய்வயானையும், ஞான சக்தியாக முருகனும் காட்சி தருகின்றனர். இயற்கை வளமும் பசுமையும் கொண்ட சோலையாக சூழ்ந்துள்ளன. மூலிகைகள், பழவகைகள் ஆகிய மரங்கள் நிறைந்து காணப்படுகின்றன. இதனால் 'சோலைமலை' எனப்பட்டது. முன்நாளில் வேல் மட்டும் ஸ்தாபித்து வழிபட்டனர். இதனால் 'வேற்கோட்டம்' என அழைத்தனர். சிறுவன் வடிவிலிருந்த முருகன், அவ்வையாரின் தமிழை சோதிக்க எண்ணி, "சுட்ட பழம் வேண்டுமா? சுடாத பழம் வேண்டுமா?" எனக் கேட்டு, நாவல் மரக்கிளையை உலுக்கி பழங்களை கீழே உதிரச் செய்த இடம் என்பதால் 'பழமுதிர்சோலை' எனப் பெயர் கொண்டது. (பழம் - உதிர் - சோலை). முருகன், வள்ளியை திருமணம் புரிவதற்காக, விநாயகரே யானை வடிவில் வந்து உதவிய இடம் என்று கச்சியப்ப சிவாச்சாரியார் பாடலில் வருகிறது.