அருள்மிகு கோவிந்தராஜப் பெருமாள் திருக்கோயில் (சிதம்பரம்)

மூலஸ்தானத்தில் கோவிந்தராஜப் பெருமாள் கிழக்கே திருமுக மண்டலம் கொண்டு, அனந்தன் மேல் போகசயனத்தில் சேவை சாதிக்கின்றார். அஷ்டாட்சர படிகளுடன் கூடிய வேதசிரம் எனும் பீடத்தில் சயனித்துள்ளார். திருவடிகளருகே ஸ்ரீ தேவி, பூதேவி தேவியர்கள் அமர்ந்துள்ளனர். புண்டரீகவல்லித் தாயார் தனி சந்நிதி கொண்டுள்ளார். இரத்தின ஆசனத்தில் வீற்றிருந்த கோலத்தில் உற்சவ மூர்த்தி தேவாதிதேவன் சேவை சாதிக்கின்றார். இவருக்கு பார்த்தசாரதி என்றொரு திருநாமம் உண்டு. சித்திரக்கூடத்துள்ளான் எனும் மற்றொரு உற்சவர் உபய நாச்சியார்களுடன் சேவை சாதிக்கின்றார். சந்நிதி பிரகாரத்தில் நரசிங்கர், வேணுகோபாலர், கஜேந்திர வரதர், வனவாசக் கோல ராமர், ஹனுமன், ஆண்டாள் சந்நிதிகள் இருக்கின்றன. அர்த்த மண்டபத்தின் இரு பக்கங்களிலும் ஸுதர்ஸனர்/பாஞ்சஜன்யர் ஆழ்வார்களும், பெருமாளுக்கெதிரே கருடாழ்வாரும் எழுந்தருளியுள்ளனர்.